مسلم ریاستوں کا فوجی اتحاد کسی ملک،فرقہ اور مذہب کے خلاف نہیں: راحیل شریف

raheelsharifspeechatsaudiledalliance

سعودی عرب کی  قیادت میں قائم مسلم ممالک کے عسکری اتحاد کے سربراہ اور پاکستان کے سابق آرمی چیف جنرل راحیل شریف نے کہا ہے کہ اس اتحاد کا واحد مقصد دہشت گردی کے خلاف لڑنا ہےاور یہ اتحاد کسی ملک، مسلک یا دین کے خلاف نہیں بنایا گیا ہے۔

انھوں نے مزید کہا کہ دہشت گردی کے خلاف متحد ہو کر موثر کارروائی کی ضرورت ہے. اسلامی ممالک کا یہ فوجی اتحاد رکن ممالک کو انٹیلی جنس معلومات کی فراہمی کے ساتھ ان ممالک کی فورسز کی استعدادِ کار میں اضافے کے لیے تعاون بھی فراہم کرے گا۔

سعودی عرب کے شہر ریاض میں ہونے والے اجلاس میں راحیل شریف نے کہا کہ گزشتہ چھ برسوں میں دہشت گردی کے واقعات میں 70 فی صد سے زائد ہلاکتیں مسلم ممالک میں ہوئیں۔ پاکستان کا ذکر کرتے ہوئے انھوں نے کہا کہ پاکستان نے دہشت گردی کے خلاف جنگ میں نمایاں کامیابی حاصل کی اور حالات کا رخ موڑ دیا۔

سعودی عرب میں جاری اتحادی ملکوں کے اجلاس میں شرکت کے لیے پاکستان کے وزیر اعظم شاہد حاقان عباسی، وزیر خارجہ خواجہ آصف، وزیر دفاع غلام دستگیر اور جنرل قمر باجوہ بھی سعودی عرب روانہ ہو چکے ہیں۔

اجلاس کی صدارت سعودی عرب کے ولی عہد شہزادہ محمد بن سلمان کر رہے ہیں۔

Leave a Reply

Your email address will not be published. Required fields are marked *